ವಿವರಣೆ

ಇವು 20 ಮೀ ಎತ್ತರದವರೆಗೆ ಬೆಳೆಯುವ ನಿತ್ಯಹರಿದ್ವರ್ಣ ಮರಗಳಾಗಿವೆ, ಇವುಗಳ ತೊಗಟೆ ಕಂದು ಅಥವಾ ಕಂದು ಮಿಶ್ರಿತ ಕಪ್ಪು ಬಣ್ಣದಿಂದ ಕೂಡಿದ್ದು, ಲಂಬವಾದ ಬಿರುಕುಗಳೊಂದಿಗೆ ಒರಟಾಗಿರುತ್ತದೆ; ಕೊಂಬೆಗಳು ಗಂಟುಗಳಿಂದ ಕೂಡಿರುತ್ತವೆ ಮತ್ತು ಮೃದುವಾದ ಉಣ್ಣೆಯ ಕೂದಲಿನಿಂದ ಮುಚ್ಚಲ್ಪಟ್ಟಿರುತ್ತವೆ. ಕೇಂದ್ರ ಕಾಂಡದ ಎರಡೂ ಬದಿಯಲ್ಲಿ ಸಮಾನ ಸಂಖ್ಯೆಯ ಚಿಗುರೆಲೆಗಳನ್ನು ಹೊಂದಿದ್ದು, ಪರ್ಯಾಯವಾಗಿರುತ್ತವೆ: ಚಿಗುರೆಲೆಗಳು ಆಯತಾಕಾರ,ರೋಮರಹಿತ, ಕಾಗದದಂತಹ ವಿನ್ಯಾಸ, ಬುಡ ಅಸಮಾನ (ಓರೆಯಾಗಿ ಒಂದು ಬದಿಯು ಇನ್ನೊಂದಕ್ಕಿಂತ ದೊಡ್ಡ,ಅಗಲ ಅಥವಾ ದುಂಡಾಗಿರುತ್ತದೆ) , ತುದಿ ಮೊಂಡಾಗಿದ್ದು, ಸಂಪೂರ್ಣ ಅಂಚನ್ನು ಹೊಂದಿರುತ್ತವೆ. ಪುಷ್ಪಮಂಜರಿ (ರೇಸಿಮ್) ಕಾಂಡದ ತುದಿಯಲ್ಲಿ ಸಮಾನ ಮಧ್ಯಂತರಗಳಲ್ಲಿ ಸಣ್ಣ ಸಮಾನ ಕಾಂಡಗಳಲ್ಲಿ ಜೋಡಿಸಲಾದ ಪ್ರತ್ಯೇಕ ಹೂವುಗಳನ್ನು ಒಳಗೊಂಡಿರುತ್ತದೆ. ಹೂವುಗಳು ದ್ವಿಲಿಂಗಿ ಆಗಿದ್ದು, ನಸುಗೆಂಪು-ಗುಲಾಬಿ ಚುಕ್ಕೆಗಳೊಂದಿಗೆ ಹಳದಿ ಬಣ್ಣದಲ್ಲಿರುತ್ತವೆ. ಬೀನ್ಸ್ ನಂತಹ ಉದ್ದವಾದ, ಕಿರಿದಾದ, ಆಯತಾಕಾರದ (ಪೋಡ್) ಹಣ್ಣನ್ನು ಹೊಂದಿದ್ದು, ಇದರ ಹೊರ ಮೇಲ್ಮೈ ಗಟ್ಟಿಯಾದ ಶೆಲ್ ನಿಂದ ಕೂಡಿರುತ್ತದೆ. ಇವು ತಿರುಳುಳ್ಳ ಮೆಸೊಕಾರ್ಪ್ ( ಎಂಡೋಕಾರ್ಪ್ ಮತ್ತು ಎಕ್ಸೋಕಾರ್ಪ್ ನಡುವೆ ಹಣ್ಣಿನ ಪೆರಿಕಾರ್ಪ್‌ನ ಮಧ್ಯದ ಪದರ), ವಿಭಜಿತಗೊಂಡಿರುವ ಎಂಡೋಕಾರ್ಪ್ (ಬೀಜವನ್ನು ಹೊಂದಿರುವ ಹಣ್ಣುಗಳ ಪೆರಿಕಾರ್ಪ್‌ನ ಗಟ್ಟಿಯಾದ ಒಳ ಪದರ) ಅನ್ನು ಹೊಂದಿರುತ್ತದೆ ಮತ್ತು ಗಡುಸಾಗಿರುತ್ತದೆ, ಇವು ಹಣ್ಣಾದಾಗ ಬೀಜಗಳನ್ನು ಬಿಡಲು ಬಾಯಿತೆರೆದುಕೊಳ್ಳುವುದಿಲ್ಲ. ಇವು ಕಂದುಬಣ್ಣದ ಅಂಡಾಕಾರದಿಂದ ವೃತ್ತಾಕಾರದ ಸಂಕುಚಿತ ಬೀಜವನ್ನು ಹೊಂದಿರುತ್ತದೆ.