ವಿವರಣೆ

ಪೊದೆಗಳು ಅಥವಾ ಸಣ್ಣ ನಿತ್ಯಹರಿದ್ವರ್ಣ ಮರವಾಗಿದೆ, ಎಲೆಗಳು ಮತ್ತು ಹಣ್ಣುಗಳ ಮೇಲಿನ ಮೇಲ್ಮೈಯನ್ನು ಹೊರತುಪಡಿಸಿ ಉಳಿದ ಭಾಗಗಳು ನಸು ಬಿಳಿಬಣ್ಣದಿಂದ ಬೂದು ಬಣ್ಣದ ಉಣ್ಣೆಯ ರೀತಿಯ ಕೂದಲಿನಿಂದ ದಟ್ಟವಾಗಿ ಮುಚ್ಚಿರುತ್ತವೆ. ಕಿರುಕೊಂಬೆಗಳು ಅಡ್ಡ ಛೇದದಲ್ಲಿ ನಾಲ್ಕು ಕೋನಗಳನ್ನು ಹೊಂದಿದೆ ಮತ್ತು ಇದರ ಪರಿಣಾಮವಾಗಿ ನಾಲ್ಕು ಬದಿಗಳಲ್ಲಿ ಕವಲೊಡೆದಿರುತ್ತದೆ. ಇವು 3 ರಿಂದ 5 ಎಲೆಗಳನ್ನು ಹೊಂದಿದ್ದು, ಸಂಯುಕ್ತವಾಗಿರುತ್ತದೆ. ಎಲೆಗಳು ಕಾಂಡದ ಮೇಲೆ ವಿರುದ್ಧವಾಗಿ ಕತ್ತರಿ ಮಾದರಿಯ ಆಕಾರವನ್ನು ಹೊಂದಿರುತ್ತದೆ, ಚಿಗುರೆಲೆಗಳು ಸಾಮಾನ್ಯವಾಗಿ ಕಿರಿದಾದ ಆಯತಾಕಾರದ ಅಥವಾ ದೀರ್ಘವೃತ್ತದಿಂದ ಎರಡು ಕಡೆಗೂ ತುದಿ ಮೊನೆಗೂಡುವಂತೆ ಈಟಿಯ ತಲೆಯ ಆಕಾರವನ್ನು ಹೊಂದಿದ್ದು ಕಾಗದದ ಹಾಗೆ ತೆಳ್ಳಗಿರುತ್ತವೆ. ಎಲೆಯ ಮೇಲ್ಭಾಗವು ಕಡು ಹಸಿರು ವಿರಳವಾಗಿ ಮೃದುತುಪ್ಪಳದಿಂದ ಕೂಡಿರುತ್ತದೆ. ಎಲೆಯ ಕೆಳ ಭಾಗವು ತೆಳು ಬೂದುಬಣ್ಣದ ಮೃದುತುಪ್ಪಳದಿಂದ ಕೂಡಿರುತ್ತದೆ. ಎಲೆಯ ಚೂಪಾದ ಬುಡ, ಕಿರಿದಾಗಿ ಉದ್ದವಾಗಿರುವ ತುದಿಯು, ನಯವಾದ ಅಥವಾ ಗರಗಸದ ಹಲ್ಲನ್ನು ಹೋಲುವ ಅಂಚನ್ನು ಹೊಂದಿರುತ್ತವೆ. ಕಾಂಡದ ತುದಿಯಲ್ಲಿ ಹೆಚ್ಚು ಕವಲೊಡೆದ ಪುಷ್ಪಮಂಜರಿಯನ್ನು ಹೊಂದಿವೆ. ಇವು ಸಾಮಾನ್ಯವಾಗಿ ನೀಲಿ ಅಥವಾ ನೇರಳೆ ಬಣ್ಣದ, ಸಣ್ಣ, ದ್ವಿಲಿಂಗಿ ಹೂವುಗಳನ್ನು ಹೊಂದಿದ್ದು, ಬಹಳ ಚಿಕ್ಕ ಕಾಂಡದಿಂದ ಒಂದೇ ಹೂವನ್ನು ಹೂಗೊಂಚಲುಗಳಿಗೆ ಜೋಡಿಸುತ್ತದೆ. ಇವು ಉಪಗೋಳಾಕೃತಿ ಅಥವಾ ಸ್ವಲ್ಪಮಟ್ಟಿಗೆ ಅಂಡಾಕಾರದ (ಡ್ರೂಪ್) ಸರಳ ತಿರುಳಿರುವ ಹಣ್ಣನ್ನು ಹೊಂದಿರುತ್ತವೆ, ಸಾಮಾನ್ಯವಾಗಿ ಹಣ್ಣು 4 ಭಾಗಗಳನ್ನು ಹೊಂದಿದ್ದು, ಪ್ರತಿ ಭಾಗದಲ್ಲಿ ಒಂದು ಬೀಜವಿರುತ್ತದೆ.